बादी सरोकार मञ्च नेपाल विशेष र विविधतायुक्त लक्षित समूहका लागि उनीहरुसँगै काम गर्ने एक अग्रणी संस्था हो, ती समूहहरु नै संस्थाका लाभग्राही हुन् । लाभग्राहीको प्रकृति र आवश्यकता अनुसार उनीहरुलाई तीन वटा उपसमूहमा वर्गीकरण गरिएको छ । ती उपसमूह यस प्रकारका छन्ः

1. बादी समुदायः बादी समुदाय संस्थाका मुख्य लाभग्राही हुन् किनभने यो समुदाय सामाजिक रुपमा वञ्चित र राजनीतिक रुपमा वेवास्ता गरिएको र आर्थिक रुपमा विपन्न अवस्थामा रहेको छ । यो समुदायलाई नेपालमा अछुत ठानिएका समुदायमध्ये पनि निकै विपन्न र गरिव हुनुका साथै गलत व्यवहार सामना गर्ने र गलत रुपमा परिभाषित समुदाय हो । 
2. दलितः नेपालमा दलित समुदाय सबैभन्दा बढी वञ्चित व्यक्तिको समूह हो । उनीहरुले पुस्तौदेखि अछुत भन्दै गरिने अमानवीय व्यवहार भोगिरहेका छन् र तथाकथित उच्च जातले उपयोग गरिरहेको अवसरबाट उनीहरु वञ्चित भएका छन् । उनीहरुलाई अव्यवस्थित स्थानमा बस्न बाध्य पारिएको छ भने भूमिहिनकै अवस्थामा जीवन निर्वाह गर्नुपर्ने बाध्यता उनीहरुलाई छ । त्यस्तै, दलित समुदायले परम्परागत रुपमा तोकिएका सीप र कौशल प्रयोग गरेर तथाकथित उच्च जातलाई सेवा दिनुपर्ने अवस्था विद्यमान छ । दलितलाई शक्ति, पैसा र शिक्षाको पहुँच दिन अस्वीकार गरिएको स्थिति छ । यो अवस्थाले आर्थिक, शैक्षिक र सहभागिताको सवालमा दलितहरु विपन्न परिस्थितिमा रहेको प्रष्ट रुपमा देखाउँछ ।
3. अन्य बहिष्कृत र पिछडिएका समूह÷व्यक्तिः बादी र दलित बाहेक पनि अन्य त्यस्ता समुदाय छन्, जो लामो समयदेखि राष्ट्रिय मूलप्रवाहीकरणको प्रक्रियाबाट विमुख छन् ।